କାନାଡାରେ ମାସକ ପାଇଁ ଭାରତ ଓ ପାକିସ୍ତାନର ଯାତ୍ରୀବାହୀ ବିମାନ ବାତିଲ

କାନାଡାରେ ମାସକ ପାଇଁ ଭାରତ ଓ ପାକିସ୍ତାନର ଯାତ୍ରୀବାହୀ ବିମାନ ବାତିଲ
କାନାଡାରେ ମାସକ ପାଇଁ ଭାରତ ଓ ପାକିସ୍ତାନର ଯାତ୍ରୀବାହୀ ବିମାନ ବାତିଲ

ଭାରତରେ କୋଭିଡର ଦ୍ୱିତୀୟ ପର୍ଯ୍ୟାୟ ସଂକ୍ରମଣର ଭୟାବହତାକୁ ଦୃଷ୍ଟିରେ ରଖି କାନାଡା ସରକାର ଭାରତରୁ ଆସୁଥିବା ସମସ୍ତ ଯାତ୍ରୀବାହୀ ବିମାନ ଉପରେ ୩୦ ଦିନ ପାଇଁ କଟକଣା ଲଗାଇଛନ୍ତି। ଏଥିସହିତ ମାସକ ପାଇଁ ପାକିସ୍ତାନରୁ ସମସ୍ତ ଯାତ୍ରୀବାହୀ ବିମାନର ଉଡାଣ ଉପରେ ପ୍ରତିବନ୍ଧକ ଲଗାଯାଇଛି।

କାନାଡାର ପରିବହନ ମନ୍ତ୍ରୀ ଓମାର ଅଲଘାବ୍ରା କହିଛନ୍ତି ଯେ କାନାଡାକୁ ଯେତେ ସଂଖ୍ୟକ ବିମାନ ଯାତ୍ରୀ ଆସୁଛନ୍ତି, ସେମାନଙ୍କ ମଧ୍ୟରେ ସର୍ବାଧିକ ସଂଖ୍ୟକ କୋଭିଡ ପଜିଟିଭ ଭାରତ ଓ ପାକିସ୍ତାନରୁ ଆସୁଥିବା ଯାତ୍ରୀଙ୍କ ମଧ୍ୟରୁ ଚିହ୍ନଟ କରାଯାଉଛି। ସେଥିପାଇଁ ଏହି ଦୁଇ ରାଷ୍ଟ୍ରରୁ ସମସ୍ତ ବ୍ୟବସାୟିକ ଏବଂ ବ୍ୟକ୍ତିଗତ ଯାତ୍ରୀବାହୀ ବିମାନ ଚଳାଚଳକୁ ମାସକ ପାଇଁ ବନ୍ଦ ରଖାଯାଇଛି। ଏହି ନିଷ୍ପତ୍ତି ସାମୟିକ ଭାବେ ନିଆଯାଇଛି। ପରେ ପରିସ୍ଥିତିକୁ ବିଚାରକୁ ନେଇ ସରକାର ନିଷ୍ପତ୍ତି ନେବେ।

ଟିକା, ପିପିଇ କିଟ୍‍ ଏବଂ ଅନ୍ୟ ଅତ୍ୟାବଶ୍ୟକ ସାମଗ୍ରୀ ପରିବହନ ପାଇଁ ଉକ୍ତ ବିମାନଗୁଡିକୁ ଅନୁମତି ଦିଆଯିବ। କାନାଡାକୁ ଆସୁଥିବା ସମସ୍ତ ବିମାନଯାତ୍ରୀଙ୍କ ନିମନ୍ତେ ଯାତ୍ରାରମ୍ଭ ପୂର୍ବରୁ ଏବଂ ବିମାନ ବନ୍ଦରରେ ପହଞ୍ଚିବା ପରେ ସେମାନଙ୍କର କୋଭିଡ ପରୀକ୍ଷା ବାଧ୍ୟତାମୂଳକ କରାଯାଇଛି। ଏଥିସହିତ ଦେଶକୁ ଆସୁଥିବା ବିମାନଯାତ୍ରୀ ୧୪ ଦିନ କ୍ୱାରେଣ୍ଟାଇନରେ ରହିବା ବାଧ୍ୟତାମୂଳକ କରାଯାଇଛି।