ରବର୍ଟ ଭଦ୍ରାଙ୍କ ଅଗ୍ରୀମ ଜାମିନ ଖାରଜ ପାଇଁ ହାଇକୋର୍ଟରେ ଇଡି

Spread the News

ଅର୍ଥ ଠକେଇ ମାମଲାରେ ରବର୍ଟ ଭଦ୍ରାଙ୍କୁ ମିଳିଥିବା ଅଗ୍ରୀମ ଜାମିନ ଖାରଜ କରିବାକୁ ପ୍ରବର୍ତ୍ତନ ନିର୍ଦ୍ଦେଶାଳୟ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ତ ହୋଇଛି। କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଭିଣୋଇ ରବର୍ଟ ଭଦ୍ରାଙ୍କୁ ଏପ୍ରିଲ 1ରେ ଟ୍ରାଏଲ କୋର୍ଟ ଅଗ୍ରୀମ ଜାମିନ ପ୍ରଦାନ କରିଥିଲେ। ଭଦ୍ରାଙ୍କୁ ସୁରକ୍ଷା ଦିଆଯିବା ଫଳରେ ତାଙ୍କ ବିରୁଦ୍ଧରେ ଥିବା ଅର୍ଥ ଠକେଇ ମାମଲାର ତଦନ୍ତ ବ୍ୟାହତ ହେବା ଆଶଙ୍କା ସୃଷ୍ଟି ହୋଇଥିବା ଇଡି ଓକିଲ ଡି.ପି. ସିଂହ କୋର୍ଟଙ୍କୁ ଅବଗତ ଜଣାଇଛନ୍ତି। ମାମଲାର ପରବର୍ତ୍ତୀ ଶୁଣାଣି ସୋମବାର (ମେ 27)ରେ ହେବାର ସମ୍ଭାବନା ରହିଛି।

ଇଡି ମଧ୍ୟ ଭଦ୍ରା ସ୍କାଇଲାଇଟ ହସ୍ପିଟାଲିଟିର କର୍ମଚାରୀ ମନୋଜ ଅରୋରାଙ୍କୁ ଦିଆଯାଇଥିବା ଅଗ୍ରୀମ ଜାମିନର ବିରୋଧ କରିଛି। ମନୋଜ ଏହି ମାମଲାରେ ଅନ୍ୟତମ ଅଭିଯୁକ୍ତ ଅଛନ୍ତି। ଭଦ୍ରା ଲଣ୍ଡନସ୍ଥିତ ବ୍ରୀନଷ୍ଟନ ସ୍କୋୟାରରେ 1.9 ମିଲିଅନ ପାଉଣ୍ଡ ମୂଲ୍ୟର ସମ୍ପତ୍ତି କ୍ରୟ କରିଥିବା ସମୟରେ ଅର୍ଥ ଠକେଇ କରିଥିବା ଅଭିଯୋଗ ହୋଇଛି। ପୂର୍ବରୁ ଭଦ୍ରାଙ୍କୁ ଅଗ୍ରୀମ ଜାମିନ ପ୍ରଦାନ କରି କୋର୍ଟଙ୍କ ବିନା ଅନୁମତିରେ ଦେଶ ବାହାରକୁ ନ ଯିବା ପାଇଁ ସର୍ତ୍ତ ରଖିଥିଲେ। ତଦନ୍ତକାରୀ ଅଫିସରଙ୍କୁ ସହଯୋଗ କରିବାକୁ ମଧ୍ୟ କୋର୍ଟ ଭଦ୍ରାଙ୍କୁ ନିର୍ଦ୍ଦେଶ ଦେଇଥିଲେ।

2018ଡିସେମ୍ବର 7 ଓ 8ରେ ଭଦ୍ରାଙ୍କ କାର୍ଯ୍ୟାଳୟ ଖାନତଲାସୀ କରାଯାଇ ପ୍ରାୟ 20 ହଜାର ପୃଷ୍ଠାର ଦସ୍ତାବିଜ ଜବତ ହୋଇଥିବା କୋର୍ଟ ଅନୁଧ୍ୟାନ କରିଥିଲେ। ଇଡି କୋର୍ଟଙ୍କୁ ଜଣାଇଥିଲେ ଯେ ଭଦ୍ରାଙ୍କୁ ବିଚାର ବିଭାଗୀୟ ହାଜତକୁ ପଠାଯାଉ ନ ହେଲେ ସେ ତଦନ୍ତ ପ୍ରକ୍ରିୟାରେ ବାଧା ସୃଷ୍ଟି କରିପାରନ୍ତି।

Tags: