29ରେ ଅରୁଣାଚଳ ପ୍ରଦେଶର ମୁଖ୍ୟମନ୍ତ୍ରୀ ଭାବେ ଶପଥ ନେବେ ପେମା ଖାଣ୍ଡୁ

Spread the News

ଅରୁଣାଚଳ ପ୍ରଦେଶର ମୁଖ୍ୟମନ୍ତ୍ରୀ ଭାବେ ପେମା ଖାଣ୍ଡୁ ଆସନ୍ତା 29ତାରିଖରେ ଶପଥ ନେବେ । 60 ଆସନ ବିଶିଷ୍ଟ ଅରୁଣାଚଳ ପ୍ରଦେଶ ବିଧାନସଭାରେ 41ଟି ଆସନରେ ଐତିହାସିକ ବିଜୟ ହାସଲ କରି 2ୟ ଥର ପାଇଁ ସେ ମୁଖ୍ୟମନ୍ତ୍ରୀ ଭାବେ ଶପଥ ନେବେ। ଇଟାନଗରଠାରେ ବରିଷ୍ଠ ବିଜେପି ନେତା ତଥା କେନ୍ଦ୍ରୀୟ ପର୍ଯ୍ୟବେକ୍ଷକ ଜେ.ପି ନଡ୍ଡା, ରାମ ମାଧବ ଏବଂ ହିମନ୍ତ ବିଶ୍ଵଶର୍ମାଙ୍କ ଉପସ୍ଥିତିରେ ପେମା ଖାଣ୍ଡୁ ସର୍ବସମ୍ମତକ୍ରମେ ବିଧାୟକ ଦଳ ନେତା ନିର୍ବାଚିତ ହୋଇଛନ୍ତି । ପରେ ସେ ରାଜ୍ୟପାଳ ବି.ଡି. ମିଶ୍ରଙ୍କୁ ଭେଟି ସରକାର ଗଠନ କରିବା ପାଇଁ ଦାବି ଉପସ୍ଥାପନ କରିଥିଲେ।

ରବିବାର ସେ ରାଜ୍ୟପାଳଙ୍କୁ ସାକ୍ଷାତ କରି ନିଜର ତଥା କ୍ୟାବିନେଟର ଇସ୍ତଫା ପ୍ରଦାନ କରିଥିଲେ । ସୂଚନାଯୋଗ୍ୟ ଅରୁଣାଚଳ ପ୍ରଦେଶର ନବମ ବିଧାନସଭାର କାର୍ଯ୍ୟକାଳ ଜୁନ୍‍ ପହିଲାରେ ଶେଷ ହେଉଛି ଓ ତାହା ପୂର୍ବରୁ ନୂଆ ବିଧାନସଭା ଗଠିତ ହେବା ଆବଶ୍ୟକ।

ଅନ୍ୟପକ୍ଷରେ ସଂଯୁକ୍ତ ଜନତା ଦଳ, ବିଜେପିର ବରିଷ୍ଠ ନେତାମାନଙ୍କ ସହ କଥାବାର୍ତ୍ତା ପରେ ଅରୁଣାଚଳ ପ୍ରଦେଶରେ ବିଜେପି ନେତୃତ୍ୱର ସରକାରକୁ ସମର୍ଥନ କରିବ କି ନାହିଁ, ସେ ସଂକ୍ରାନ୍ତରେ ନିଷ୍ପତ୍ତି ନେବ। ଏ ସଂକ୍ରାନ୍ତରେ ନିଷ୍ପତ୍ତି ନେବାକୁ ଦଳର ସଭାପତି ନିତୀଶ କୁମାରଙ୍କୁ କ୍ଷମତା ପ୍ରଦାନ କରିଛି । ସମ୍ପ୍ରତି ଶେଷ ହୋଇଥିବା ବିଧାନସଭା ନିର୍ବାଚନରେ 7ଟି ଆସନରୁ ବିଜୟୀ ହୋଇ ଜେଡିୟୁ ଅରୁଣାଚଳ ପ୍ରଦେଶରେ ଦ୍ୱିତୀୟ ବୃହତ୍ତମ ଦଳ ହୋଇଛି।

Tags: