ରାଜ୍ୟସଭା ସାଂସଦ ଅମର ସିଂଙ୍କ ପରଲୋକ

Spread the News

ଶନିବାର ଅପରାହ୍ଣରେ ରାଜ୍ୟସଭା ସାଂସଦ ତଥା ପୂର୍ବତନ ସମାଜବାଦୀ ନେତା ଅମର ସିଂହଙ୍କର ୬୪ ବର୍ଷ ବୟସରେ ସିଙ୍ଗାପୁରରେ ଦେହାନ୍ତ ହୋଇଯାଇଛି। ଦୀର୍ଘଦିନ ଧରି ଅସୁସ୍ଥ ଥିବା ସିଂହ କିଛି ମାସ ହେବ ସିଙ୍ଗାପୁରରେ ଚିକିତ୍ସାଧୀନ ଥିଲେ। ନିକଟରେ ‘ମୁମ୍ବାଇ ମିରର୍‌’ରେ ପ୍ରକାଶିତ ରିପୋର୍ଟ ଅନୁସାରେ, ସେ ‘ଆଇସିୟୁ’ରେ ଥିଲେ ଏବଂ ତାଙ୍କ ପରିବାରବର୍ଗ ମଧ୍ୟ ତାଙ୍କ ପାଖରେ ଥିଲେ। ୨୦୧୩ରେ ତାଙ୍କ ବୃକ୍କକ ଅକାମି ହୋଇ ଯାଇଥିଲା।

ଅସୁସ୍ଥତା ସତ୍ୱେ ସିଂହ ସାମାଜିକ ଗଣମାଧ୍ୟମରେ ଖୁବ୍ ସକ୍ରିୟ ଥିଲେ। ଆଜି ମଧ୍ୟ ସେ ସ୍ଵାଧୀନତା ସଂଗ୍ରାମୀ ଏବଂ ଶିକ୍ଷାବିତ ବାଳଗଙ୍ଗାଧର ତିଳକଙ୍କ ମୃତ୍ୟୁ ବାର୍ଷିକୀ ଅବସରରେ ଶ୍ରଦ୍ଧାଞ୍ଜଳି ଟୁଇଟ୍ କରିବା ସହ ନିଜ ଅନୁଗାମୀମାନଙ୍କୁ ଇଦ୍ ଅଲ୍ ଆଧା ଉପଲକ୍ଷେ ଶୁଭେଚ୍ଛା ଜ୍ଞାପନ କରିଥିଲେ।

ତାଙ୍କର ମୃତ୍ୟୁ ଘଟିଛି ବୋଲି ଉଠିଥିବା ଗୁଜବର ଖଣ୍ଡନ ପାଇଁ ମାର୍ଚ ୨ ତାରିଖ ଦିନ ମଧ୍ୟ ସେ ଅନ୍ୟ ଏକ ଭିଡିଓ ପୋଷ୍ଟ୍‌ କରିଥିଲେ। ଭିଡିଓ ସହ ଛୋଟ ବାର୍ତ୍ତାରେ ସେ ଲେଖିଥିଲେ: ‘ଟାଇଗର୍ ଜିନ୍ଦା ହୈ’ ଅର୍ଥାତ୍ ‘ବାଘ ବଞ୍ଚିଛି’।

ସମାଜବାଦୀ ପାର୍ଟି ଛାଡ଼ିବା ପରେ ଜଣେ ରାଜନେତା ଭାବେ ସିଂହଙ୍କ ଗୁରୁତ୍ୱ ହ୍ରାସ ପାଇଥିଲା। ସେ ସମାଜବାଦୀ ପାର୍ଟିର ମୁଖ୍ୟ ମୁଲାୟମ ସିଂହ ଯାଦବଙ୍କ ଅତି ଘନିଷ୍ଠ ବୋଲି ଦିନେ ବିବେଚିତ ହେଉଥିଲେ। ନିକଟରେ ସେ ଟୁଇଟ୍ କରିଥିଲେ ଯେ ସେ ଆଉ କେବେ ହେଲେ ସମାଜବାଦୀ ପାର୍ଟିକୁ ଫେରିବେ ନାହିଁ।