ପାକିସ୍ତାନକୁ ଝଟକା; ମ୍ୟାଚ ପୂର୍ବରୁ ଗସ୍ତ ବାତିଲ କଲା ନ୍ୟୁଜିଲାଣ୍ଡ

ପାକିସ୍ତାନକୁ ଝଟକା; ମ୍ୟାଚ ପୂର୍ବରୁ ଗସ୍ତ ବାତିଲ କଲା ନ୍ୟୁଜିଲାଣ୍ଡ
aninews

ଆଜିଠାରୁ ଆରମ୍ଭ ହେବାକୁ ଥିବା ନ୍ୟୁଜିଲାଣ୍ଡ-ପାକିସ୍ତାନ ମଧ୍ୟରେ ଦିନିକିଆ ଓ ଟି-୨୦ ସିରିଜ୍‌ ବାତିଲ ହୋଇଛି । ପ୍ରଥମ ମ୍ୟାଚ ରାଓ୍ବଲପିଣ୍ଡିରେ ଖେଳାଯିବାକୁ ଥିଲା । ତେବେ ସୁରକ୍ଷାଗତ କାରଣଙ୍କୁ ନ୍ୟୁଜିଲାଣ୍ଡ ଟିମ୍ ସମ୍ପୂର୍ଣ୍ଣ ଗସ୍ତକୁ ବାତିଲ କରିଛି । ଏହାକୁ ନେଇ ଟ୍ବିଟ୍‌ କରି ସ୍ପଷ୍ଟ କରିଛି ନ୍ୟୁଜିଲାଣ୍ଡ କ୍ରିକେଟ ବୋର୍ଡ । ୨୦୦୩ ମସିହା ପରେ ପ୍ରଥମ ଥର ପାଇଁ ପାକିସ୍ତାନ ମାଟିରେ ସିରିଜ ଖେଳିଥାନ୍ତା ନ୍ୟୁଜିଲାଣ୍ଡ ଦଳ ।

ପାକିସ୍ତାନରେ ନ୍ୟୁଜିଲାଣ୍ଡ ଦଳ ପାଇଁ ସୁରକ୍ଷାଗତ ସମସ୍ୟା ରହିଛି । ନ୍ୟୁଜିଲାଣ୍ଡର ସୁରକ୍ଷା ପରାମର୍ଶଦାତାଙ୍କ ସହ ମତ ନେବାପରେ ପ୍ରଥମ ମ୍ୟାଚ ପୂର୍ବରୁ ଗସ୍ତ ଆରମ୍ଭ ହେବା ପୂର୍ବରୁ ବାତିଲ କରିବାକୁ ନିଷ୍ପତ୍ତି ନେଇଛି ନ୍ୟୁଜିଲାଣ୍ଡ କ୍ରିକେଟ ବୋର୍ଡ । ଆଜି ହିଁ ନ୍ୟୁଜିଲାଣ୍ଡ ଦଳ ପାକିସ୍ତାନ ଛାଡ଼ିବ । ଖେଳାଳିଙ୍କ ପାଇଁ ସମସ୍ତ ପ୍ରକାର ପ୍ରସ୍ତୁତି କରାଯାଉଛି ।

ଏହାକୁ ନେଇ ନ୍ୟୁଜିଲାଣ୍ଡ କ୍ରିକେଟ ବୋର୍ଡ ମୁଖ୍ୟ ଡେବିଡ ହ୍ୱାଇଟ୍‌ କହିଛନ୍ତି, "ଆମକୁ ଯେଉଁ ପରାମର୍ଶ ମିଳୁଥିବା ତାହାରି ମଧ୍ୟରେ ଗସ୍ତ ଜାରି ରଖିବା ସମ୍ଭବ ନଥିଲା । ପିସିବି ପାଇଁ ଏହାଏକ ଝଟକା ହେବ ତାହା ମୁଁ ବୁଝି ପାରୁଛି । କିନ୍ତୁ ଆମ ପାଇଁ ଖେଳାଳିଙ୍କ ସୁରକ୍ଷା ସର୍ବୋପରି । ଏଥିପାଇଁ ଏହି ଜଟିଳ ନିଷ୍ପତ୍ତି ନେବାକୁ ବାଧ୍ୟ ହେଉଛୁ ।"

ନ୍ୟୁଜିଲାଣ୍ଡ କ୍ରିକେଟ ବୋର୍ଡର ଏହି ନିଷ୍ପତ୍ତିକୁ ସମର୍ଥନ କରିଛି ନ୍ୟୁଜିଲାଣ୍ଡ କ୍ରିକେଟ ପ୍ଲେୟାର୍ସ ଆସୋସିଏସନ ମୁଖ୍ୟ ହିଥ୍‌ ମିଲ୍ସ । ସେ କହିଛନ୍ତି ଯେ, "କିୱି କ୍ରିକେଟର ବର୍ତ୍ତମାନ ସୁରକ୍ଷିତ ରହିଛନ୍ତି । ପାକିସ୍ତାନରୁ ବାହାରିବାକୁ ପ୍ରକ୍ରିୟା ଜାରି ରହିଛି ।"

ତେବେ ନ୍ୟୁଜିଲାଣ୍ଡ ଦଳ ଉପରେ ପାକିସ୍ତାନରେ କେଉଁ ଭଳି ଭାବରେ ଅସୁରକ୍ଷିତ ମଣୁଛନ୍ତି ତାହାର ବିବରଣୀ ଦିଆଯାଇନାହିଁ । ଏହାକୁ ନେଇ କୌଣସି ଉତ୍ତରେ ଦେବାକୁ ମନା କରି ଦେଇଛନ୍ତି ନ୍ୟୁଜିଲାଣ୍ଡ କ୍ରିକେଟ ବୋର୍ଡ ।