ସଜେଇ ହୋଇଥିଲା ବାସର ଶେଜ, ଅପେକ୍ଷା କରିଥିଲା କନିଆଁ,କିନ୍ତୁ ସୁକୁଟାକୁ ଉଠାଇନେଲେ ଖାକି ମାମୁଁ

ସଜେଇ ହୋଇଥିଲା ବାସର ଶେଜ, ଅପେକ୍ଷା କରିଥିଲା କନିଆଁ,କିନ୍ତୁ ସୁକୁଟାକୁ ଉଠାଇନେଲେ ଖାକି ମାମୁଁ
ସଜେଇ ହୋଇଥିଲା ବାସର ଶେଜ, ଅପେକ୍ଷା କରିଥିଲା କନିଆଁ,କିନ୍ତୁ ସୁକୁଟାକୁ ଉଠାଇନେଲେ ଖାକି ମାମୁଁ

ଭୁବନେଶ୍ୱର ୧୪।୦୩: ସରିଥିଲା ବାହାଘର । କାଲି ଥିଲା ଚଉଠି । ମାତ୍ର ତା ପୂର୍ବରୁ ବରକୁ ଉଠାଇ ଆଣିଲା ପୁଲିସ । ସାରା ରାତି ଫୁଲ ଶେଜ ବଦଳରେ ଥାନା ହାଜତରେ ସମୟ କଟିବାକୁ ବାଧ୍ୟ ହୋଇଥିଲା ବର । ରାଜଧାନୀ ଉପକଣ୍ଠରେ ଥିବା ଭରତପୁର ଅଞ୍ଚଳରେ ଏଭଳି ଏକ ଅଭାବନୀୟ ଘଟଣା ଘଟିଛି । ଗିରଫ ହୋଇଥିବା ବରଙ୍କ ନାଁ ହେଲା ସୋମନାଥ ମହାପାତ୍ର ଓରଫ ସୁକୁଟା (୩୫) । ପୁଲିସ ତାଙ୍କୁ କୋର୍ଟଚାଲାଣ କରିଛି ।

ଖବର ଅନୁଯାୟୀ, ସୁକୁଟା ଭରତପୁର ବସ୍ତିରେ ଭଡାସୂତ୍ରରେ ରହୁଥିଲେ । ସୁକୁଟାଙ୍କର ଏକ ଚିକେନ ପକୋଡା ଦୋକାନ ରହିଛି । ସେ ୫ ବର୍ଷ ତଳେ କେନ୍ଦ୍ରାପଡାର ସୁକନ୍ୟା (ଛଦ୍ମନାମ)ଙ୍କୁ ବିବାହ କରିଥିଲେ । ତେବେ ଏହି ଦମ୍ପତିଙ୍କର କୌଣସି ସନ୍ତାନସନ୍ତତି ହୋଇ ନଥିଲା । ସୁକୁଟା ଏହାକୁ ନେଇ ସୁକନ୍ୟାଙ୍କ ସହ ସବୁବେଳେ ଝଗଡ଼ା କରୁଥିଲେ । ଅନେକ ସମୟରେ ସୁକନ୍ୟାଙ୍କୁ ମାରଧାର କରୁଥିଲେ । ଏଥିପାଇଁ ଘରେ ସବୁବେଳେ ଝଗଡ଼ା ଲାଗି ରହୁଥିଲା । ଗତ ଦୁଇ ମାସ ତଳେ ସୁକନ୍ୟାଙ୍କୁ ଛାଡି଼ ସୁକୁଟା କୁଆଡେ ଗାୟବ ହୋଇଯାଇଥିଲେ । ତାଙ୍କର କୌଣସି ଖୋଜ ଖବର ମିଳିନଥିଲା । ତେବେ ଦୁଇ ମାସ ପରେ ସୁକୁଟା ହଠାତ ଭରତପୁରରେ ପହଞ୍ଚିଲେ । ସାଙ୍ଗରେ ଥିଲେ ଆଉ ଜଣେ ମହିଳା । ତାଙ୍କୁ ମନ୍ଦିରରେ ବିବାହ କରିଥିବା ସାହିପଡିଶାରେ କହି ବୁଲିଲେ । ସୁକନ୍ୟା ରହୁଥିବା ଘରକୁ ନଯାଇ ସେହି ଭରତପୁରରେ ଆଉ ଏକ ଘର ଭଡ଼ା ନେଇ ରହିଲେ । ସେହିଠାରେ ହିଁ ଆଉ ଥରେ ରୀତି ଅନୁସାରେ ବାହାଘରର ଆୟୋଜନ ହେଲା । ଭୋଜିଭାତ ବି ହେଲା । ବନ୍ଧୁ ବାନ୍ଧବ ଚର୍ଚ୍ଚା ସହିତ ବାହା ଘର ବି ସରିଲା ।

ତେବେ ସ୍ୱାମୀଙ୍କ ଦ୍ୱିତୀୟ ବିବାହ ଖବର ସୁକନ୍ୟାଙ୍କ କାନରେ ପଡ଼ିବା ପରେ ସେ ରବିବାର ସନ୍ଧ୍ୟାରେ ସିଧା ଯାଇ ଭରତପୁର ଥାନାରେ ହାଜର ହେଲେ । ଆଉ ପତିଦେବଙ୍କ ନାଁରେ ପୁଲିସକୁ ଧରାଇଥିଲେ ଲମ୍ବା ଚଉଡ଼ା ଅଭିଯୋଗ । ତାଙ୍କ ସ୍ୱାମୀ ସୁକୁଟା କିଛି ଦିନ ତଳେ ଗିରଫ ହୋଇ ଚର୍ଚ୍ଚାକୁ ଆସିଥିବା ନକଲି ଡାକ୍ତର ରମେଶ ସ୍ୱାଇଁଙ୍କ ଭଳି ବିବାହ କରୁଥିବାର ଅଭିଯୋଗ ଆଣିଥିଲେ । ପୁଲିସ ତୁରନ୍ତ ଏକ ଟିମ୍‌ ସହ ସୁକୁଟା ରହୁଥିବା ଘରେ ପହଞ୍ଚିଥିଲା । ସୁକୁଟା ଚଉଠି ରାତି ବିତାଇବା ପୂର୍ବରୁ ପୁଲିସ ଭ୍ୟାନ୍‌ରେ ବସାଇ ତାଙ୍କୁ ଥାନାକୁ ଆଣିଥିଲା । ସେ କେବଳ ସୁକନ୍ୟା କି ଆଉ କାହାକୁ ସେହିଭଳି ଧୋକା ଦେଇଛନ୍ତି, ଏନେଇ ପଚରାଉଚରା ଚଳାଇଛି ।