ଯୋଗୀ ଆଦିତ୍ୟନାଥଙ୍କ ନିଷ୍ପତ୍ତି; ପ୍ରତ୍ୟାହୃତ ହେବ ମହାମାରୀ ଅଧିନିୟମ ଅନୁଯାୟୀ ପଞ୍ଜୀକୃତ ମାମଲା

ଯୋଗୀ ଆଦିତ୍ୟନାଥଙ୍କ ନିଷ୍ପତ୍ତି; ପ୍ରତ୍ୟାହୃତ ହେବ ମହାମାରୀ ଅଧିନିୟମ ଅନୁଯାୟୀ ପଞ୍ଜୀକୃତ ମାମଲା

ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କରୋନା ଅବଧି ସମୟରେ ମହାମାରୀ ଅଧିନିୟମ ଅନୁଯାୟୀ ପଞ୍ଜୀକୃତ ମାମଲା ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି। ଯୋଗୀ କହିଛନ୍ତି ଯେ ଜନସାଧାରଣଙ୍କ ସ୍ୱାର୍ଥକୁ ଦୃଷ୍ଟିରେ ରଖି କୋଭିଡ ମହାମାରୀ ଆଇନ ଉଲ୍ଲଂଘନ ସହ ପଞ୍ଜୀକୃତ ମାମଲା ପ୍ରତ୍ୟାହାର ହେବା ଉଚିତ। ଏ ବାବଦରେ ଗୃହ ବିଭାଗ ଦ୍ୱାରା ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ | ସେହିପରି ଯୋଗୀ ଆଜି ଉତ୍ତରପ୍ରଦେଶ ପୁଲିସରେ ଥିବା ଦୁର୍ନୀତିଗ୍ରସ୍ତ ପୁଲିସ କର୍ମଚାରୀଙ୍କୁ କଡା ଟାର୍ଗେଟ କରିଛନ୍ତି |

ସେ କହିଛନ୍ତି ଯେ ଖରାପ ରେକର୍ଡ ଥିବା କଳଙ୍କିତ ପୁଲିସମାନଙ୍କର ଏକ ତାଲିକା ଶୀଘ୍ର ପ୍ରସ୍ତୁତ ଏବଂ ଉପସ୍ଥାପନ କରାଯିବା ଉଚିତ୍। ଏହିପରି ଲୋକମାନେ ଉତ୍ତରପ୍ରଦେଶ ପୁଲିସର ଭାବମୂର୍ତ୍ତି ଉପରେ ଆଞ୍ଚ ଆଣୁଛନ୍ତି | ସମସ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଯୋଗୀ ଅତିରିକ୍ତ ମୁଖ୍ୟ ଶାସନ ସଚିବ ଏବଂ ଗୃହ ବିଭାଗର ଡିଜିପିଙ୍କୁ କହିଛନ୍ତି ଯେ ଦୁର୍ନୀତି ସହ ଜଡିତ କୌଣସି ପୁଲିସ୍ ୟୁପି ପୁଲିସରେ ରହିବା ଉଚିତ୍ ନୁହେଁ। ସୂଚନା ଥାଉ କି କରୋନା ପାଇଁ ଲାଗୁ ହୋଇଥିବା ଲକଡାଉନ ସମୟରେ କଟକଣା ନ ମାନିବା ସହ ମାସ୍କ ପିନ୍ଧିନଥିଲେ ମହାମାରୀ ଅଧିନିୟମ ଅନୁଯାୟୀ ମାମଲା ରୁଜୁ କରାଯାଇଥିଲା | କେତେକେ କ୍ଷେତ୍ରରେ ସମ୍ପୃକ୍ତ ବ୍ୟକ୍ତିଙ୍କୁ ଗିରଫ ମଧ୍ୟ କରାଯାଇଥିଲା |